Disable Preloader

தமிழ்நாடு அரசு கல்லூரி ஆசிரியர் கழகம்

குடியேற்ற காலத்திலும், நாட்டின் விடுதலைக்குப் பின்னரும் இந்திய மற்றும் தமிழ்நாட்டின் உயர்கல்வித்துறைகள், ஆசிரியர்களின் ஊதியம் மற்றும் பணி நிலைகளில் அலட்சியப் போக்கையே காட்டி வந்தன. இப்பிரச்சனைகளை ஆய்ந்து தீர்ப்பதற்காக அரசு கலை & அறிவியல், ஆசிரியர் பயிற்சிக் கல்லூரிகளின் ஆசிரியர்கள் புதுக்கோட்டையில் 1971இல் கூடி தமிழ்நாடு அரசு கல்லூரி ஆசிரியர் கழகம் (ஆங்கிலத்தில் - ) எனும் பெயருடன் கழகத்தை முறையாக தோற்றுவித்தனர். பதிவு செய்யப்பட்ட அமைப்பாக இருந்த இவ்வமைப்பு தமிழ்நாடு அரசால் 1980-இல் அங்கீகரிக்கப்பட்டது.

ஆசிரியர் கழகத்தின் விரிவாக்க நிலையை தனித்து இயங்கிய காலம் (1971-78), கூட்டு நடவடிக்கைக் குழு காலம் (1978-85), கூட்டு இயக்க விரிவாக்கக் காலம் என மூன்று கால கட்டங்களாகப் பிரிக்கலாம். முதல் நிலையில், தமிழ்நாடு அரசு கல்லூரி கல்வி நிர்வாகத்தில் ஏற்பட்ட நடைமுறை நெருக்கடிகளை தமிழ்நாடு அரசு கல்லூரி ஆசிரியர் கழகம் அகற்ற முற்பட்டது. இரண்டாம் நிலையில், தமிழ்நாடு அரசு கல்லூரி ஆசிரியர் கழகம் தனியார் கல்லூரி ஆசிரியர் சங்கங்களான பல்கலைகழக ஆசிரியர் சங்கம், மதுரை காமராசர் பல்கலைக்கழக ஆசிரியர் மன்றம் ஆகிய சங்கங்களுடன் இணைந்து போராடி பல்கலைக்கழக மானியக் குழுவின் ஊதிய விகிதங்களை தமிழ்நாட்டுக் கல்லூரி மற்றும் பல்கலைக்கழக ஆசிரியர்களுக்குப் பெற்றுத் தந்தது. மூன்றாம் நிலையில் தமிழ்நாடு அரசு கல்லூரி ஆசிரியர் கழகம், பள்ளி ஆசிரியர்களுடன் இணைந்து ஆசிரியர் சமுதாய நிலை மேம்பட பணியாற்றியது.

தமிழகத்தின் உயர்கல்வி வளர்ச்சி மற்றும் ஆசிரியர்களின் ஊதியம், பணிநிலை மேம்பாடு ஆகியவை மட்டுமே தமிழ்நாடு அரசு கல்லூரி ஆசிரியர் கழகத்தின் குறிக்கோள் அல்ல. கூடுதலாக,

  • 1). தமிழக அரசு கல்லூரி ஆசிரியர்கள் சமுதாயத்தில் மதிப்பு வாய்ந்த அடையாளத்தைப் பெறுவது;
  • 2). நாட்டுப்புறம் சார்ந்த, ஒடுக்கப்பட்ட, சமூக மற்றும் பொருளாதாரத்தில் பின்தங்கிய ஏழை மாணவர்களுக்குக் கல்வி கற்பிப்பதில் ஆக்கபூர்வமான முயற்சி;
  • 3). நகர்புறம் சார்ந்த ஒதுக்கிவிடப்பட்ட மாணவர்களுக்கு உதவுதல்;
  • 4). அரசுக்கும் மாணவர்களின் பெற்றோர்களுக்கும் இடையே பாலமாகச் செயலாற்றுதல் போன்றவை தமிழ்நாடு அரசு கல்லுரி ஆசிரியர் கழகத்தின் குறிப்பிடத்தகுந்த பணிகளாகும்.

தமிழ்நாடு அரசு கல்லூரி ஆசிரியர் கழக அமைப்பு மூன்று அடுக்குகளைக் கொண்டது. தமிழக அரசு கலை, அறிவியல் மற்றும் கல்வியியல் கல்லூரியில் நிரந்தர அடிப்படையில் பணியமர்த்தப்பட்டு பணிபுரியும் ஆசிரியர் கழக விதிகளுக்கு உட்பட்டு, ரூ 1000/-ஐ ஆண்டு உறுப்பினர் கட்டணமாகச் செலுத்தி தமிழ்நாடு அரசு கல்லூரி ஆசிரியர் கழகத்தின் உறுப்பினர் ஆகலாம்.

தமிழக அரசு கலை, அறிவியல் மற்றும் கல்வியியல் கல்லூரிகள் ஒவ்வொன்றும் கழகத்தின் ஒரு கிளை ஆகும். இக்கிளைகள், தம் உறுப்பினர்களின் நலனைப் பாதுகாக்கும் வகையில் அடித்தட்டு அமைப்பாகச் செயல்படுகின்றன. கிளைக் கழகமானது, தனது அமைப்பு நடைமுறைகளை, ஒரு தலைவர், ஒரு துணைத்தலைவர், ஒரு செயலர், ஒரு இணைச்செயலர், ஒரு பொருளர் மற்றும் மாநில பொதுக்குழு உறுப்பினர்கள் ஆகியோர்களின் செயலபாட்டினால் மேற்கொள்கின்றது.

கழகத்தின் இடைநிலை அமைப்பாக மண்டலங்கள் செயல்படுகின்றன. தமிழகமெங்கும் உள்ள அரசு கல்லூரிக் கிளைகள், சென்னை, வேலூர், கடலூர், தஞ்சாவூர், திருச்சி, சேலம், கோயம்புத்தூர், மதுரை மற்றும் சிவகங்கை என மொத்தம் 9 மண்டலங்களின் மேலாண்மையின் கீழ் பணியாற்றுகின்றன. மண்டலமானது, தனது அமைப்பு நடைமுறைகளை, ஒரு தலைவர், ஒரு துணைத்தலைவர், ஒரு செயலர், ஒரு இணைச்செயலர் மற்றும் ஒரு பொருளர் ஆகியோர்களின் செயலபாட்டினால் மேற்கொள்கின்றது.

தமிழ்நாடு அரசு கல்லூரி ஆசிரியர் கழகத்தின் மாநில அளவிலான மேல்முகட்டு அமைப்பு நடைமுறைகளை, ஒரு தலைவர், இரு துணைத்தலைவர்கள் (1 பொது & 1 மகளிர்), ஒரு பொதுசசெயலர், இரு இணைச்செயலர்கள் (1 பொது & 1 மகளிர்), ஒரு பொருளர் ஆகியோர்களின் செயலபாட்டினால் மேற்கொள்கின்றது. தமிழ்நாடு அரசு கல்லூரி ஆசிரியர் கழகத்தின் தலைமையகம் சென்னையில் உள்ள திருவல்லிக்கேணியில் அமைந்துள்ளது.

ஐந்து தசாப்தங்களையுடைய தனது நீண்ட வரலாற்றில், TNGCTA தனது சீரிய நோக்கங்கள் மற்றும் குறிக்கோள்களை அடைவதற்குத் தேவையான நியாயமான கோரிக்கைகளை அரசாங்கம் மற்றும் அதிகாரிகளின் கவனத்திற்கு தொடர்ந்து முறையீடுகள் மூலமும், தேவை ஏற்படின் இருதரப்பு பேச்சுவார்த்தைகள் வாயிலாகவுமே கொண்டு சென்று நிறைவேற்றி வந்துள்ளது. ஆனால் சில நேரங்களில், தவிர்க்க இயலாத சூழ்நிலைகளில் அரசு / அதிகாரிகளின் கவனத்தைப் ஈர்த்து, தமது உறுப்பினர்களின் உண்மையான மற்றும் நியாயமான கோரிக்கைகளை நிறைவேற்ற வலியுறுத்தி, பொதுமக்கள் மற்றும் ஊடகங்கள் ஆதரவுடன் வெகுஜன போராட்டங்களை வழி நடத்தியுள்ளது.

கழகத்தின் இத்தகு சீரிய செயல்பாடுகளால், ஆசிரியர்களின் ஊதியம், பணிப்பாதுகாப்பு, பணிநிலை, உயர்கல்வியின் சீரமைப்பு நடைமுறை சார்ந்த முயற்சிகளின் முன்னேற்றத்தை ஏற்படுத்துவதில் தமிழ்நாடு அரசு கல்லுரி ஆசிரியர் கழகம் மிகப்பெரிய வெற்றி பெற்றுள்ளது. மேலும், பொதுநலன் சார்ந்த சமூக காரணங்களுக்காகவும், இயற்கை பேரழிவுகளின் போதும் கழகம் தனது ஆதரவு மற்றும் பங்களிப்பை எப்போதும் வழங்கி வருகிறது.

உயர்கல்வித் தொகுதி, தொலைதூரக் கல்வி, ஆராய்ச்சி சூழல், ஆராய்ச்சி நிதி, கலந்தாய்வுச் செயல்பாடுகள், உயர்கல்வி விரிவாக்கத்திற்கு தேவைக்கான பொதுமக்களிடையே விழிப்புணர்வு போன்ற வளர்ச்சி செயல்பாடுகளை மேற்கொள்வதில் தமிழ்நாடு அரசு கல்லுரி ஆசிரியர் கழகத்தின் செம்மையான பணி இங்கு குறிப்பிடத் தகுந்ததாகும்.

GUIDING LIGHTS